Cynllun Llifogydd Stryd Stephenson

Diweddariad yr hydref

Mae'n bleser gennym rannu â chi fod y gwaith ar gynllun Rheoli Perygl Llifogydd Stryd Stephenson ar fin cael ei gwblhau.

Dyma gipolwg sydyn ar y gwaith sydd wedi bod yn digwydd dros y chwe mis diwethaf:

• Mae'r briffordd newydd oddi ar East Bank Road wedi'i chwblhau ynghyd â rhan uwch o'r arglawdd ac mae ar agor i draffig. Bydd y briffordd newydd yn ffurfio llwybr mynediad i fodurwyr pan fydd y llifddorau yn weithredol a bydd yn caniatáu i fusnesau’r ardal barhau i weithredu mor agos ag sydd bosibl at ddigwyddiadau llanwol.
• Mae'r wal goncrit sydd wedi'i hatgyfnerthu o amgylch ystâd ddiwydiannol Felnex bron â chael ei chwblhau ac mae hon yn ffurfio 35% arall o'r amddiffyniad cyffredinol rhag llifogydd. 
• Mae llain amgaeedig y cartref cŵn wedi cael ei hailosod ac yn cael ei defnyddio unwaith eto gan dîm yr NCC
• Mae gwaith ar ran ddwyreiniol Llwybr Arfordir Cymru yn dod yn ei flaen ac yn aros am osod arwyneb ac mae'r gwaith i ehangu'r arglawdd pridd yn datblygu ac yn dechrau troi'n wyrddach.

Cymerwch olwg ar y ffilm hon o’r awyr sy'n dangos y gwaith ar y cynllun mewn mwy o fanylder:

Alun Griffiths Shoot 29 Drone Assembly on Vimeo

Mis Chwefror 2024 – blwyddyn ers i'r gwaith adeiladu ddechrau 

Flwyddyn ers i'r gwaith adeiladu ddechrau, rydym yn falch o allu dweud bod y prosiect yn gwneud cynnydd da.

Dyma gip sydyn ar ba waith sydd wedi'i gwblhau erbyn hyn:

• Mae’r gwaith o osod 700 metr llinol o bolion dalen wedi’i gwblhau, er mwyn helpu i gryfhau’r arglawdd ar hyd Afon Wysg.
• Mae'r rhan fwyaf o'r wal goncrit sydd wedi'i hatgyfnerthu o amgylch ystad ddiwydiannol Felnex wedi'i chwblhau, sy'n ffurfio 35% arall o'r amddiffyniad cyffredinol rhag llifogydd.
• Mae’r gwaith paratoi ar gyfer y rhan uchel o’r briffordd oddi ar Ffordd East Bank bron wedi’i gwblhau, a bydd hyn yn darparu llwybr amgen i ddefnyddwyr ffordd yn yr ardal.

Rhagor o wybodaeth ar gael yn ein datganiad i’r wasg

Mae'r ffilm drôn hon o'r awyr yn dangos y cynnydd sydd wedi'i wneud ar y cynllun llifogydd newydd hyd yma: 

https://vimeo.com/901866861/9fe2440871

Mae'r llun uchod yn dangos y llanw uchel ar hyd Afon Wysg yng Nghasnewydd ar 12 Chwefror, wrth ymyl y 700 metr llinol o bolion dalen sydd wedi'u cwblhau yn ddiweddar, gan helpu i gryfhau'r arglawdd ar hyd Afon Wysg.

Gorffennaf 2023 – chwe mis ar ôl cychwyn y gwaith : cipolwg ar y cynnydd hyd yma

Dros y chwe mis diwethaf mae ein contractwr, Alun Griffiths, wedi bod yn gweithio'n galed ar adeiladu'r cynllun llifogydd yn Llyswyry. Dyma grynodeb o'r gwaith a wnaed hyd yma:

Clirio llystyfiant

Bellach mae'r gwaith clirio llystyfiant ar hyd y cynllun llifogydd o'r pwynt gogleddol ym Mharc Coronation hyd at Liberty Steel yn y de wedi'i gwblhau. Mae'r gwaith clirio hwn wedi caniatáu i'n contractwyr ddechrau ar y rhan o'r amddiffynfa llifogydd sy’n cynnwys polion dalen.

Gwaith gosod polion dalen

Dechreuodd y gwaith o osod polion dalen ar hyd Afon Wysg ym mis Ebrill a disgwylir i’r gwaith fod wedi ei orffen erbyn diwedd Awst 2023.

Mae polion dalen yn fath o sylfaen ddofn a ddefnyddir mewn gwaith adeiladu. Mae'r polion dalen a ddefnyddir yn ddarnau o ddur wedi'u hailgylchu a'u cynhyrchu'n adnewyddadwy, sy'n cael eu bwrw i’r ddaear hyd at ddyfnder penodol. Mae ganddyn nhw ymylon sy'n cyd-gloi ac maen nhw'n ffitio gyda'i gilydd i ffurfio wal neu rwystr sy'n strwythurol gadarn. Nid ydynt yn difrodi'r ddaear o'u cwmpas, yn wahanol i bolion concrit cyffiniol neu rai wedi’u tyllu.

Mae’r polion dalen wedi’u gosod gan ddefnyddio gwasgydd hydrolig yn null Giken, sydd wedi bod yn gymorth sylweddol i leihau’r dirgryniadau a'r tarfu oherwydd sŵn ar fywyd gwyllt a diwydiant lleol.

Creu llwybr newydd i fusnesau lleol o amgylch Ystad Ddiwydiannol Felnex

Mae’r gwaith paratoi yn mynd rhagddo ar gyfer y rhan o'r briffordd wedi’i chodi oddi ar Heol East Bank. Disgwylir i'r briffordd newydd gael ei chwblhau yn Haf 2024. Bydd hyn yn darparu llwybr amgen i ddefnyddwyr ffordd yn yr ardal, pe bai'r llifddor ar Heol Corporation yn cael ei gweithredu at ddibenion cynnal a chadw neu cyn adegau pan ragwelir llif llanw brig. 

Gwelliannau i Lwybr Arfordir Cymru

Mae gwaith wedi dechrau ar Lwybr Arfordir Cymru i wella'r llwybr cyhoeddus; bydd hyn yn gwella'r llwybr yn weledol ac yn ei wneud yn fwy hygyrch.  

Mae'r ffilm drôn hon o'r awyr yn dangos y cynnydd sydd wedi'i wneud ar y cynllun llifogydd newydd hyd yma: 

https://vimeo.com/849458461/cab0d2f7fa

Mehefin 2023 - AS lleol yn ymweld ag amddiffynfa rhag llifogydd Stryd Stephenson

13 Chwefror – Gwaith adeiladu'n dechrau'n swyddogol

Heddiw, (dydd Llun, 13 Chwefror) mae'r gwaith yn dechrau'n swyddogol ar gynllun llifogydd Stryd Stephenson!

Bydd gwaith i glirio'r llystyfiant ar hyd y cynllun o Barc Coronation i Liberty yn cael ei wneud dros yr wythnosau nesaf.

Disgwylir i'r gwaith galluogi ar gyfer y rhan uwch o'r briffordd ddechrau ym mis Mawrth a’r bwriad yw bod y gwaith torri llystyfiant ar y priffyrdd a gosod polion dalen yn dechrau ym mis Ebrill.

Ionawr 2023 – gwaith adeiladu i fod i ddechrau

Rydym yn falch o gyhoeddi y bydd y gwaith adeiladu ar y cynllun rheoli perygl llifogydd yn dechrau ym mis Chwefror eleni, gydag Alun Griffiths wedi ei benodi'n brif gontractwr.

Rhagor o wybodaeth ar gael yn ein datganiad i'r wasg

Mae'r bwnd llifogydd presennol yn llwybr troed cyhoeddus ac mae hefyd yn rhan o Lwybr Arfordir eiconig Cymru. CNC sy'n gyfrifol am reoli a hyrwyddo Llwybr Arfordir Cymru ac mae'n deall y gwerth a ddaw yn ei sgil.

Mae’r argymhellion yn golygu y bydd angen adlinio rhywfaint o Lwybr Arfordir Cymru mewn rhai mannau er mwyn gallu codi’r bwnd presennol a gosod wal bentyrru newydd ar gyfer llifogydd.

Mae ein cynlluniau'n cynnwys uwchraddio'r rhan o Lwybr Arfordir Cymru yr effeithir arni, ynghyd â gwelliannau i'r man gwyrdd ym Mharc Coronation.

Bydd llwybr newydd yn cael ei greu ym Mharc Coronation i ddarparu gwell cysylltiad â glan yr afon a'r caeau chwaraeon, gan greu llwybr cerdded crwn. Bydd llwyfannau gwylio yn cael eu hintegreiddio i'r arglawdd i ganiatáu ar gyfer mannau gorffwys a darparu cysylltiad â chynefinoedd glan yr afon.

Bydd ardaloedd i blannu coed a blodau gwyllt yn cael eu darparu yn y parc i gynyddu bioamrywiaeth leol, yn ogystal â thair coedwig drefol sy'n darparu tua 1,600 o goed ifainc newydd.

Bydd biniau ychwanegol yn cael eu gosod i leihau sbwriel a gwastraff cŵn a byrddau dehongli newydd sy'n darparu gwybodaeth am brosiect, bioamrywiaeth a threftadaeth yr ardal.

Mae Afon Wysg yn y lleoliad hwn yn Ardal Cadwraeth Arbennig (ACA) ac yn Safle o Ddiddordeb Gwyddonol Arbennig (SoDdGA) ac mae'n ymestyn o'r afon i grib yr arglawdd. Mae rhannau o'r arglawdd hefyd yn Safleoedd o Bwysigrwydd er Cadwraeth Natur (SINC) oherwydd eu cynefinoedd.

Mae’r wangen, sef math o bysgodyn, yn nodwedd o’r ACA ac mae’n hynod o sensitif i ddirgryniad.

Mae cofnodion hanesyddol hefyd yn dangos bod nifer o rywogaethau sy’n cael eu gwarchod yn yr ardal – gan gynnwys adar atodlen un, dyfrgwn, ystlumod a thylluanod gwynion. Mae arolygiadau hefyd wedi nodi cynefinoedd posibl ar gyfer llygod pengrwn y dŵr, pathewod, moch daear a madfallod dŵr cribog.

Mae arolygon cynhwysfawr sy'n benodol i rywogaethau arbennig mewn ardal astudio wedi cadarnhau nad yw'r rhain yn debygol o fod yn bresennol nac yn bridio o fewn yr ardal waith yr effeithir arni. Ym mis Mai 2021, ymchwiliwyd ymhellach i goed ger y cynllun mewn perthynas â’r posibilrwydd y gallai ystlumod ddewis clwydo yno, a bydd gwaith yn agos at un goeden yn cael ei wneud yn unol â Dull Rhagofalus cytûn o weithio i leihau'r posibilrwydd o aflonyddwch.

Cynlluniwyd adeiladu'r cynllun i leihau'r effaith ar unrhyw rywogaethau a chynefinoedd sensitif er mwyn sicrhau nad oes colled barhaol i gynefinoedd gwarchodedig. Bydd technegau fel peiriannau hydrolig ‘distaw’ yn cael eu defnyddio yn ystod y gwaith adeiladu mewn ardaloedd sensitif i leihau sŵn a dirgryniadau i'r eithaf. Mae lleoliad yr amddiffynfeydd arfaethedig yn ddigon pell i ffwrdd o'r afon (> 40m) er mwyn osgoi'r potensial am unrhyw effeithiau dirgryniad ar bysgod yn ystod eu tymor mudo.

Er gwaethaf dyluniad sensitif, rydym wedi nodi oddeutu 650 o goed a llwyni y bydd angen eu torri yn ystod y gwaith adeiladu. Mae asesiad o'r rhain wedi nodi bod y mwyafrif yn goed a llwyni gwerth isel, hunan-hadau a chrebachlyd. Er mwyn cyfiawnhau y weithred hon, rydym yn bwriadu ailblannu oddeutu 1,600 o goed ifainc, newydd gan greu tair ‘coedwig drefol’ yn bennaf ym Mharc y Coroni.

Edrychwch ar y PDF i gael mwy o wybodaeth.

Ceir rhagor o wybodaeth am sut rydyn ni wedi ystyried yr effaith ar yr amgylchedd yn nogfennau ein cais cynllunio (sgroliwch i lawr i weld yr atodiadau).

Byddai'r cynigion yn cynyddu’r amddiffyniad rhag llifogydd i safon digwyddiad llifogydd un mewn 200 mlynedd (mae hyn yn cyfeirio at ddigwyddiad arwyddocaol sydd â siawns o 0.5% o digwydd mewn blywddyn  neu sydd â siawns o 63.3% o ddigwydd mewn 200 mlynedd). Mae hyn yn unol â Strategaeth Rheoli Perygl Llifogydd Aber Afon Hafren.

Datblygwyd y cynigion gyda'r newid yn yr hinsawdd mewn golwg, gan gyfrif am gynnydd yn lefel y môr a'r cynnydd a ragwelir mewn glawiad dros y 50 mlynedd nesaf. Amcangyfrifwn y byddai dros 1,100 o gartrefi a 1,000 o fusnesau yn elwa o lai o berygl llifogydd o ganlyniad i'r cynllun, gan ystyried rhagfynegiadau newid hinsawdd yn y dyfodol.