Achos dros Newid

Trosolwg

Darllenwch y dudalen hon yn Saesneg / Read this page in English

Bydd Cyfoeth Naturiol Cymru (CNC) yn gwneud newidiadau pwysig i'w strwythur, gan ei alluogi i gryfhau ei ffocws ar feysydd lle gall gael yr effaith fwyaf ystyrlon ar bobl a natur.

Yn dilyn ymgynghoriad helaeth gyda'r Undebau Llafur a'u haelodau, ochr yn ochr ag ymgysylltu â staff, bydd CNC yn symleiddio ei weithgareddau ac yn canolbwyntio ei adnoddau ar ddarparu gwasanaethau hanfodol na all neb ond CNC eu darparu. Bydd yn buddsoddi mewn meysydd blaenoriaeth a fydd yn gyrru buddion hirdymor i amgylchedd naturiol Cymru gan gynnwys cryfhau ymdrechion i wella ansawdd dŵr a monitro.

Bydd y newidiadau, sydd bellach wedi'u cymeradwyo gan Fwrdd CNC, yn sicrhau bod y sefydliad mewn sefyllfa well i gyflawni amcanion ei gynllun corfforaethol i gefnogi adferiad natur, mynd i'r afael â newid yn yr hinsawdd, a lleihau llygredd.

Dywedodd Syr David Henshaw, Cadeirydd CNC: 

"Ein nod yw sicrhau bod pob punt o gyllid cyhoeddus yn cael ei defnyddio'n effeithlon ac yn effeithiol, gan ganolbwyntio ar fynd i'r afael ag argyfwng yr hinsawdd, adfer bioamrywiaeth, a risgiau amgylcheddol. Bydd y newidiadau rydyn ni'n eu gwneud nawr yn ein helpu i wneud gwahaniaeth yn y meysydd pwysicaf.

"Mae'r broses hon nid yn unig yn bwysig o ran delio â chyfyngiadau ariannol ond hefyd yn ymwneud â rhoi CNC yn y sefyllfa orau i fynd i'r afael â'r materion amgylcheddol mwyaf dybryd. Nod pob penderfyniad yw gwneud gwahaniaeth yn y meysydd lle mae ei angen fwyaf.

"Er y bydd rhai gweithgareddau'n cael eu haddasu neu eu cyflwyno'n wahanol, bydd y newidiadau'n golygu y bydd adnoddau ar gael i'w buddsoddi yn y meysydd pwysicaf. Bydd hyn yn caniatáu i CNC barhau â'i rôl arwain wrth ddiogelu adnoddau naturiol Cymru, gan sbarduno newid cadarnhaol ar gyfer cenedlaethau'r dyfodol."

Er bod CNC wedi ymrwymo i fuddsoddi mewn meysydd blaenoriaeth, bydd yn rhaid i'r sefydliad atal neu gyfyngu rhai gwasanaethau i sicrhau bod adnoddau'n cael eu defnyddio mor effeithlon ac effeithiol â phosibl.

Yn dilyn ymgynghoriad gan yr Undebau Llafur, mae nifer o gynigion wedi'u haddasu, gan leihau nifer y rolau sydd i'w dileu o'r strwythur sefydliadol. Mae'r newid hwn yn effeithio'n uniongyrchol ar 120 aelod o staff a lle bo modd, byddant yn cael eu hadleoli yn y sefydliad.

Mae'r newidiadau hyn yn adlewyrchu ymrwymiad CNC i ystyried safbwyntiau staff drwy gydol y broses.

Yn dilyn cymeradwyaeth y Bwrdd bydd rhai gwasanaethau'n cael eu lleihau neu eu darparu'n wahanol, gan gynnwys meysydd fel darparu adnoddau hamdden ar y tir sydd yn ein gofal a chyfieithu ar y pryd.

Yn ogystal, bydd rhai gweithgareddau sydd y tu allan i gyfrifoldebau statudol CNC neu sy’n cael llai o effaith ar flaenoriaethau amgylcheddol allweddol yn dod i ben. Mae hyn yn cynnwys rhoi’r gorau i gynnal gwasanaeth llyfrgell ffisegol. Bydd y gweithrediadau arlwyo a manwerthu yn y Canolfannau Ymwelwyr hefyd yn dod i ben. Bydd mwy o wybodaeth am hyn yn cael ei darparu mewn cyfarfodydd cyhoeddus.

Lle mae newidiadau yn y gwasanaethau y bydd CNC yn eu cynnig, bydd yn gweithio'n agos gyda chwsmeriaid, partneriaid a rhanddeiliaid i drosglwyddo'n esmwyth, gan sicrhau bod gwybodaeth ac adnoddau yn cael eu trosglwyddo'n brydlon i eraill lle bo hynny'n bosibl.

 Ychwanegodd Syr David:

"Rydym yn hynod ddiolchgar am yr ymroddiad a'r gwytnwch y mae ein staff wedi'i ddangos drwy gydol y cyfnod hwn o newid. Rydym yn gwybod bod hwn wedi bod yn gyfnod heriol, ac rydym yn cydnabod yr ansicrwydd y mae llawer wedi'i brofi. Nid ailstrwythuro oedd unig nod y broses hon, ond hefyd ail-lunio ein sefydliad gyda ffocws clir ar y dyfodol.

"Rydym yn deall bod cost bersonol i'r newidiadau hyn, ac rydym wedi ymrwymo i gefnogi ein tîm wrth i ni symud ymlaen. Gyda'n gilydd, rydym yn adeiladu sefydliad cryfach, mwy effeithlon, a fydd yn parhau i ddiogelu a gwella amgylchedd naturiol Cymru ar gyfer cenedlaethau'r dyfodol."

Ar y dudalen gallwch ddarllen rhai pennodau o'r Achos dros Newid ynghyd a phenawdau am y gwasanaethau a fydd yn newid.