Dengys Ffigur Un y lleoliad

Mae'r safle yn 94 hectar ac yn dir gorlifdir gwastad yn bennaf.

Mae Gogledd y safle wedi ei ddefnyddio ar gyfer silwair/gwair a phori, tra bod y gweddill yn dueddol o fod yn dir gwlypach ac wedi ei ddefnyddio ar gyfer pori ac yn cynnwys porfa barhaol gyda pheth ohono yn frwynog. Rhennir y caeau gan wrychoedd, rhai ohonynt yn aeddfed a rhai wedi'u plannu'n fwy diweddar, gyda gwrychoedd aeddfed a hynafol a choed yn y caeau (Derw yn bennaf). Mae'r gwrychoedd i raddau helaeth yn dilyn patrwm caeau hanesyddol ond nid ydynt wedi'u rheoli'n ddiweddar.

Mae gan y safle glytwaith cyfoethog o fathau o gynefinoedd gan gynnwys argloddiau graean, glaswelltir corsiog, glaswelltir niwtral, coetir gwlyb, gwrychoedd aeddfed, coed hynafol, cyrsiau dŵr o wahanol feintiau a dŵr llonydd. Mae’r cynefinoedd lled-naturiol sy’n bresennol yn brin yn yr ardal hon o ddyffryn Tywi ac os cânt eu rheoli’n gydnaws, mae ganddynt botensial mawr i gynnal bioamrywiaeth gyfoethog a chyfrannu’n sylweddol at gadernid ecosystemau yn yr ardal leol.

Mae nodweddion gorlifdir gweithredol fel ystumllynnoedd a sianeli afonydd sy'n cynnal Gwern a dŵr llonydd. Mae'r safle o fewn ffiniau'r Tywi (SoDdGA ac ACA). I'r Dwyrain o'r brif afon a'r sianeli mwy mae mynediad yn wael, mae'r tir wedi'i adael yn fraenar ac mae'n goetir torlannol sy'n adfywio'n naturiol.

Er gwybodaeth, gwerthwyd y tir fel pum lot a chawsom dri ohonynt. Roedd y ddau arall yn cynnwys cyfran uwch o dir amaethyddol mwy cynhyrchiol. Roedd y tri a sicrhawyd gennym i gyd yn cynnwys cyfran o dir mwy garw a/neu lai hygyrch, llai deniadol at ddibenion amaethyddol.

Mae'r tir yn gysgodol gyda maetholion pridd canolig i gyfoethog ac yn llaith i leithder pridd ffres. Mae rhagamcanion newid yn yr hinsawdd yn dangos bod y safle'n debygol o ddod yn gynhesach a sychach yn y dyfodol.

Dengys Ffigur Dau fap o'r safle ynghyd â rhai ffotograffau o rai o'r nodweddion amlwg.

Mae Ffigur tri yn dangos y map presennol o'r safle o'i gymharu â mapiau hanesyddol. Yn dangos sut mae ffiniau caeau a chwrs yr afon wedi newid dros amser.

Your browser does not support inline PDF viewing. Please download the PDF.

Cynllun Coetir

Ein bwriad yw creu coetir newydd amrywiol a chadarn a fydd yno i bobl Cymru ei fwynhau am byth.

Bydd y coetiroedd Coffaol yn symbol o gadernid Cymru yn ystod y pandemig ac yn un o adfywio ac adnewyddu wrth i’r coetiroedd newydd dyfu. Byddant yn lleoedd coffáu lle gall teuluoedd a ffrindiau gofio anwyliaid coll a lle bydd y cyhoedd yn gallu myfyrio ar y pandemig a’r effaith enfawr y mae wedi’i chael ar ein bywydau i gyd.

Mae Ffigur pedwar yn disgrifio'r safle ac, yn seiliedig ar y nodweddion presennol, mae'n nodi'r cynllun ar gyfer creu coetir ym mhob un o ardaloedd tra gwahanol y safle.

Mae Ffigur pump yn dangos sut y gallai'r safle edrych wrth i'r coetir ddechrau datblygu.

Paratoi tir: Ardaloedd o laswellt hirach i'w dorri. Tir i'w baratoi trwy sgriffio â llaw i greu safle plannu heb chwyn. 

Diogelu coed: Oherwydd y tywarch glaswellt sydd yno’n barod mae'n debygol y bydd glasbrennau'n agored i gylchrisglo gan famaliaid bach fel llygod pengrwn. Fodd bynnag, mae ymchwiliad safle yn dangos bod pwysau pori gan geirw a chwningod yn isel. Felly byddwn yn defnyddio troellau i amddiffyn rhag mamaliaid bach. Lle bo modd, bydd coed yn cael eu hamddiffyn rhag cystadleuaeth gan lystyfiant trwy sgriffio â llaw wrth blannu a chwynnu modur â llaw nes eu bod wedi sefydlu.