Gorsaf Bŵer Penfro - Penderfyniad Drafft

Trosolwg

Mae RWE Generation UK Plc wedi cyflwyno cais i Cyfoeth Naturiol Cymru (CNC) i newid ei drwydded amgylcheddol ar gyfer Gorsaf Bŵer Penfro (rhif trwydded EPR/DP3333TA).

Mae'r newid hwn, a elwir yn 'amrywiad', yn ofyniad cyfreithiol o dan Reoliadau Trwyddedu Amgylcheddol (Cymru a Lloegr) 2016.

Rydym wedi asesu'r newidiadau arfaethedig ac yn bwriadu caniatáu'r amrywiad i’r drwydded. Rydym yn ceisio eich sylwadau ar y drwydded ddrafft.

Manylion y Cais

Cyfeirnod y Cais: PAN-027129

Math o gais: Amrywiad sylweddol i drwydded amgylcheddol

Math o gyfleuster rheoledig: Gweithfa – Adran 1.1: Hylosgi – Rhan A(1)(a) Llosgi unrhyw danwydd mewn dyfais sydd â mewnbwn thermol â sgôr o 50 megawat neu fwy.

Lleoliad y cyfleuster rheoledig: Gorsaf Bŵer Penfro, Gorllewin Pennar, Penfro SA71 5SS

Gweithredwr: RWE Generation UK Plc

Mae gan Orsaf Bŵer Penfro bum tyrbin nwy cylch cyfun (CCGTs) sy'n cynhyrchu trydan gan ddefnyddio tanwydd nwy naturiol.

Mae'r gweithredwr wedi gwneud cais i amrywio'r drwydded i ychwanegu cyfleuster cynhyrchu hydrogen electrolytig at y weithfa, wedi'i bweru gan drydan o ffynonellau ynni adnewyddadwy ac sy'n cyfateb i weithgaredd a restrir o dan Adran 4.2: Cemegau Anorganig – Rhan A(1)(a)(i) Cynhyrchu cemegau anorganig megis – nwyon (er enghraifft hydrogen).

Mae'r cais yn cynnwys disgrifiad o sut y gallai'r newidiadau arfaethedig effeithio ar y weithfa; y deunyddiau, y sylweddau a'r ynni y bydd yn eu defnyddio ac yn eu cynhyrchu; amodau ei safle; ffynhonnell, natur a maint ei allyriadau rhagweladwy a'u heffaith bosibl, y technegau arfaethedig ar gyfer atal, lleihau a monitro ei allyriadau ac atal ac adfer gwastraff; ac amlinelliad o'r prif ddewisiadau amgen, os o gwbl, a ystyriwyd.

Ein penderfyniad drafft

Rydym yn bwriadu caniatáu'r amrywiad i’r drwydded. Dim ond os credwn na fydd llygredd sylweddol yn cael ei achosi a bod gan y gweithredwr y gallu i fodloni amodau'r drwydded y byddwn yn caniatáu amrywio trwydded.

Mae'r drwydded yn cynnwys amodau priodol i ddiogelu iechyd pobl a'r amgylchedd. 

Pam y mae eich barn chi yn bwysig  

Dyma eich cyfle i edrych ar ein penderfyniad drafft a chyflwyno eich sylwadau. Byddwn yn ystyried yr holl ymatebion perthnasol cyn i ni wneud ein penderfyniad terfynol ar y cais am drwydded. 

Gweler Cyfoeth Naturiol Cymru / Cyfranogiad y cyhoedd: sut y gallwch chi gymryd rhan yn ein hymgynghoriadau ar drwyddedau am ragor o wybodaeth am sut rydym yn ymgynghori a pha faterion sydd o fewn ein cylch gwaith rheoleiddio.  

Gallwch weld y dogfennau drafft canlynol gan ddefnyddio'r dolenni isod:

• Trwydded ddrafft
• Hysbysiad amrywio drafft
• Dogfen y penderfyniad drafft

Mae'r dogfennau hyn ar gael hefyd ar ein cofrestr gyhoeddus ar-lein.

Gallwch gyflwyno eich sylwadau gan ddefnyddio'r ddolen ymgynghori ar-lein isod. Os oes gennych unrhyw broblemau wrth gyflwyno eich sylwadau, gallwch anfon eich sylwadau atom drwy e-bost i permittingconsultations@cyfoethnaturiolcymru.gov.uk