Cynllun Rheoli Perygl Llifogydd Porthmadog

Trosolwg

Darllenwch y dudalen hon yn Saesneg / Read this page in English

Rydym yn parhau â'n gwaith i ddod o hyd i ffyrdd hirdymor o leihau'r Perygl o lifogydd yng nghymunedau Porthmadog a Thremadog.

Fel pob cymuned arfordirol, mae'r ardal yn wynebu dyfodol o chynnydd yn lefelau'r môr, stormydd amlach a mwy o law trwm, oherwydd newid yn yr hinsawdd.

Bydd hyn yn rhoi mwy o bwysau ar amddiffynfeydd rhag llifogydd ac yn cynyddu'r perygl o lifogydd os na fyddwn yn cymryd camau.

Mae rheoli'r risg o lifogydd i bobl a chartrefi yn y dyfodol mewn hinsawdd sy'n newid yn her sylweddol o ystyried tir isel ac oedran yr amddiffynfeydd presennol.

Byddwn yn diweddaru'r dudalen hon gyda gwybodaeth newydd wrth i'r prosiect symud ymlaen a gallwch weld deunyddiau blaenorol ar waelod y dudalen hon.

Ein gwaith

Mae'r prosiect yn adeiladu ar brosiectau ac astudiaethau blaenorol a bydd yn cynnwys asesu amrywiaeth o opsiynau hirdymor i leihau'r perygl o lifogydd o afonydd ac o’r môr i'r gymuned leol.

Byddwn yn ystyried ystod o ffactorau ar gyfer yr opsiynau dan sylw, megis cynaliadwyedd, hyfywedd, a fforddiadwyedd.

Mae hefyd yn adeiladu ar farn y gymuned ar opsiynau posibl i leihau'r perygl o lifogydd. Mae'r safbwyntiau hynny, naill ai o'r llythyr diweddariad prosiect yn 2021 neu yn ystod digwyddiadau galw heibio yn 2023, yn cael eu defnyddio ar hyn o bryd fel rhan o'n tystiolaeth i ymchwilio rhestr hir o opsiynau a chynnig rhestr fer.

Rydym wedi ymrwymo i weithio gyda byd natur ac i archwilio cyfleoedd i greu cynefinoedd newydd a gwella bioamrywiaeth yn yr ardal.

Efallai y bydd cyfleoedd i adfywio'r amddiffynfeydd presennol a'r mannau cyhoeddus cysylltiedig, gan ddarparu buddion ehangach i'r gymuned leol. Rydym eisiau cydweithio i ddod o hyd i atebion a all gynnig dyfodol cynaliadwy i Borthmadog.

Beth nesaf

Rydym yn disgwyl rhannu'r asesiad o'r rhestr hir o opsiynau a'r rhestr fer arfaethedig gyda'r gymuned yn Hydref 2025.

Byddwn yn cynhyrchu cyfres o ddeunyddiau ar ffurf digidol a phrint a bydd ffurflenni adborth hefyd fel y gallwch rannu eich barn.

Byddwn hefyd yn trefnu cyfres o ddigwyddiadau wyneb yn wyneb fel y gallwch ddod i siarad ag aelodau o dîm y prosiect.

Beth rydyn ni'n ei wneud yn y cyfamser

Mae'r perygl o lifogydd yn gymhleth a chyda astudiaethau ac asesiad o'r rhestr hir yn parhau, mae'n bwysig ein bod yn cael hyn yn iawn. Dros yr haf, efallai y bydd angen i ni gynnal arolygon lleol ychwanegol i helpu yn ein harfarnu.

Diweddariadau Prosiect Blaenorol

Cadw mewn cysylltiad

Cysylltwch â ni os hoffech mwy o wybodaeth neu i rannu eich barn gyda ni yn ogystal â chofrestru ar gyfer diweddariadau cynnydd yn y dyfodol:

Ebost: risgllifogydd.porthmadog@cyfoethnaturiol.cymru

Ffôn: Andrew Basford, Rheolwr Prosiect (Dysgwr Cymraeg) ar 03000 65 3846 neu Sharon Parry, Swyddog Cymorth y Prosiect (Siaradwr Cymraeg) ar 03000 65 5264.

Gallwch hefyd ysgrifennu atom:

Sharon Parry
Cyfoeth Naturiol Cymru
Swyddfa Bangor
Maes y Ffynnon,
Gwynedd,
LL57 2DW