Ymgynghoriad ar amrywio trwydded safle tirlenwi Withyhedge

Yr hyn y gallwn ei ystyried:

• Cymhwysedd y gweithredwr i fodloni amodau’r drwydded (yn unol â Nodyn Cyfarwyddyd Rheoleiddio 5: Cymhwysedd Gweithredwr)
• Unrhyw derfynau allyriadau arfaethedig i aer, tir a dŵr
• Effeithiau posibl ar iechyd a’r amgylchedd lleol
• Rheolaeth weithredol gyffredinol y cyfleuster arfaethedig
• Trin a storio unrhyw wastraff a deunyddiau crai
• Defnydd effeithlon o unrhyw ddeunyddiau crai, dŵr ac ynni
• Rheoli unrhyw arogl, sŵn, llwch, sbwriel a phlâu
• Unrhyw ffactorau lleol perthnasol y credwch nad yw’r ymgeisydd wedi’u hystyried yn ei gais
• Proses fonitro, gweithdrefnau a safonau y cytunwyd arnynt

Yr hyn na allwn ei ystyried:

• Lleoliad y safle (cylch gwaith awdurdodau cynllunio lleol)
• Traffig (cylch gwaith awdurdodau cynllunio lleol)
• Effaith weledol (cylch gwaith awdurdodau cynllunio lleol)
• Defnydd o’r tir (cylch gwaith awdurdodau cynllunio lleol)
• Oriau gweithredu neu bolisi’r llywodraeth, p’un a yw’n Llywodraeth y DU neu Lywodraeth Cymru (cylch gwaith awdurdodau cynllunio lleol)
• Penderfynu a oes angen i’r ymgeisydd hefyd gynnal asesiad o’r effaith amgylcheddol (cylch gwaith awdurdodau cynllunio lleol)
• Faint o ddeunydd crai a ddefnyddir ac o ble y mae’n dod
• Mynediad at y safle (cylch gwaith awdurdodau cynllunio lleol) 

Gallwch weld dogfennau ategol y cais a chymryd rhan yn yr ymgynghoriad isod.

Cyfeirnod y cais:PAN-025929

Rhif y drwydded: EPR/MP3330WP

Math o gais: Amrywiad sylweddol

Cyfeiriad: Safle Tirlenwi Withyhedge, Bowling Farm, Rudbaxton, Hwlffordd, SA62 4DB

Gweithredwr: Resources Management UK Ltd

Lefelau gwaith adfer diwygiedig

Yn dilyn adolygiad o’r rhannau tirlenwi a gwblhawyd, mae’r gweithredwr wedi nodi nad yw lefelau terfynol y rhannau a gwblhawyd o’r safle tirlenwi yn cyd-fynd â’r cynllun adfer a ganiatawyd. Maen nhw wedi cynnig addasu lefelau terfynol y safle tirlenwi i gyd-fynd yn well ag amodau presennol y safle. I gefnogi’r cais hwn, mae’r ymgeisydd wedi asesu’r risg ar gyfer y proffil cwblhau diwygiedig.

Rhaglen reoli a monitro wedi’i haddasu ar gyfer dŵr daear, dŵr wyneb a thrwytholch

Mae’r gweithredwr wedi gwneud cais am sawl newid i raglen reoli a monitro’r drwydded. Mae’r rhain yn cynnwys, ond heb fod yn gyfyngedig i: monitro gwell o ddŵr wyneb, addasiadau i echdynnu trwytholchion o’r rhan gaeedig o’r safle tirlenwi, a dileu amodau sy’n ymwneud ag ailgylchredeg trwytholchion. Mae asesiad risg yn cefnogi’r newidiadau hyn wedi’i gyflwyno i gefnogi’r newidiadau arfaethedig (cyfeiriwch at yr ‘Adolygiad o’r Asesiad Risg Hydroddaearegol’).

Gweithgaredd adfer gwastraff

Mae priddoedd ar gyfer peirianneg a chapio wedi’u cyrchu o’r safle o’r blaen. Gan fod y ffynhonnell hon bellach wedi’i defnyddio, mae’r gweithredwr yn gwneud cais i ychwanegu gweithgaredd adfer gwastraff at y drwydded i ganiatáu dyddodi 50,000 tunnell y flwyddyn o wastraff pridd ar y safle at ddibenion adfer. Mae cynllun adfer gwastraff wedi’i gyflwyno i gefnogi’r newid hwn.

Cyfuno a moderneiddio’r drwydded

Mae’r gweithredwr wedi gofyn am foderneiddio’r drwydded ac am gyfuno’r holl amrywiadau blaenorol ohoni. Maent hefyd wedi gofyn am adolygu’r amodau gwella ac amodau cynweithredol presennol.

Cyfeiriwch at ddogfennaeth ategol y cais am fanylion llawn cynnig y gweithredwr.