Diweddariad Coedwig: Coedwig Afan

Trosolwg

Yn dilyn cyfnod heriol o waith cwympo coed sylweddol ac adfer ar ôl stormydd, mae Cyfoeth Naturiol Cymru (CNC) yn paratoi i ailgynnau’r antur yng Nghoedwig Afan, mewn pryd ar gyfer y Pasg. 

Fe fu’n gyfnod heriol i Goedwig Afan. Yn dilyn cyfnod hir o waith cwympo coed i gael gwared ar goed llarwydd marw a heintiedig ac effaith ddinistriol stormydd — yn enwedig Storm Darragh — roedd llawer o ardaloedd yn amhosib mynd atynt, ac amharodd hynny ar dwristiaeth a’r busnesau lleol sy’n dibynnu ar fwrlwm y goedwig. 

Bu contractwyr yn gweithio’n ddiflino i glirio ardaloedd a ddifrodwyd gan stormydd, gan ganiatáu i lwybrau poblogaidd fel Awyrlin a Llafn yng Nglyncorrwg ailagor. Fodd bynnag, mae rhai rhannau ar gau o hyd er diogelwch oherwydd difrifoldeb y coed a chwythwyd i lawr yn y gwynt a'r risgiau y mae'r rhain yn eu cyflwyno.

Llwybrau sydd newydd ei haliddylunio

Diolch i gefnogaeth Cyngor Castell-nedd Port Talbot a chyllid gan Lywodraeth y DU drwy Gronfa Ffyniant Gyffredin y DU, mae rhannau o’r rhwydwaith o lwybrau wedi’u hailddylunio a’u gwella. Mae’r pecyn cyllid hwn yn dod i £173,000, gyda £160,000 o Gronfa Ffyniant Gyffredin y DU a’r gweddill gan CNC.  

Mae’r cronfeydd hanfodol hyn wedi galluogi gwaith ailddylunio ac uwchraddio hanfodol ar lwybrau Blino’n Siwps, Igam Ogam, Cam 4 a Beiciwr Newydd (glas) i wella’r profiad i feicwyr a helpu i ddenu mwy o dwristiaeth i’r ardal.  

Yn ogystal, mae gwaith adfer allweddol ar lwybrau wedi’i wneud yn bosibl gan Gronfa Coedwig Genedlaethol Llywodraeth Cymru, gan gefnogi ymdrechion i adfer mynediad i’r dirwedd werthfawr hon gan gynnwys adfer y rhan o lwybr Goodwood sy’n llwybr pren, a gwella’r llwybrau cerdded o Ganolfan Ymwelwyr Cwm Afan a Maes Parcio Rhyslyn. 

Darllenwch y diweddariad llawn ar adran newyddion ein gwefan.

Llwybrau hamdden

Nodwch y dudalen hon ac edrychwch yn ôl yma yn rheolaidd am ddiweddariadau ar ba lwybrau sydd ar agor, ar gau neu wedi'u dargyfeirio.

Uchafbwyntiau’r ymateb brys

Yn syth wedi’r storm ac yn y cyfnod cyn y Nadolig, fe wnaethon ni flaenoriaethu tasgau rheoli coed hanfodol, gan gynnwys:

• Clirio ffyrdd coedwig i sicrhau mynediad i drigolion.
• Cefnogi ffermwyr i gael mynediad at eu tir a’u da byw i sicrhau lles anifeiliaid.
• Galluogi mynediad i fastiau brys a chyfathrebu a chaniatáu i'r Grid Cenedlaethol adfer pŵer.
• Sicrhau mynediad i ffermydd gwynt ar dir a reolir gan CNC.

Edrych i’r dyfodol

Byddwn yn parhau i ddarparu diweddariadau wrth i'r gwaith fynd rhagddo a a rhagor o lwybrau ailagor.

Diolch i chi am eich amynedd a'ch cydweithrediad wrth i ni weithio i adfer ein coetiroedd.

Cyfarfod i randdeiliaid

Bydd y tîm rheoli tir lleol mewn cysylltiad yn fuan iawn i drefnu cyfarfod i randdeiliaid i roi diweddariad manylach.

Sut gallwch chi helpu

I roi gwybod am unrhyw ddigwyddiadau newydd, cysylltwch â’n llinell cymorth digwyddiadau ar 0300 065 3000 neu llenwch ein ffurflen rhoi gwybod am ddigwyddiad.