Ymgynghoriad ar dair trwydded rheolau safonol newydd a dwy drwydded rheolau safonol ddiwygiedig

Trosolwg

Rydym yn gallu gwneud trwyddedau amgylcheddol rheolau safonol i leihau'r baich gweinyddol ar fusnesau wrth gynnal safonau amgylcheddol. Maent yn seiliedig ar setiau o reolau safonol y gallwn eu cymhwyso’n eang ar draws y wlad, cyn belled ag y gellir bodloni meini prawf y lleoliad a’r amodau a nodir ym mhob un. Datblygir y rheolau gan ddefnyddio asesiadau o'r risgiau amgylcheddol a gyflwynir gan y gweithgaredd.

Mae’r ymgynghoriad hwn yn cynnig:

· Creu tair trwydded rheolau safonol newydd

· Diwygio dwy drwydded rheolau safonol bresennol

Cyn i ni wneud hyn, mae'n rhaid i ni ymgynghori am gyfnod o dri mis i ganiatáu i'r cyhoedd, diwydiant, ac unrhyw un arall sydd â diddordeb wneud sylwadau ar y cynigion. Rhaid inni ddarparu manylion ynghylch pam y gwneir y newidiadau hyn a chyfiawnhad.

I bwy y bydd hwn o ddiddordeb?

Credwn y bydd yr ymgynghoriad hwn o ddiddordeb arbennig i’r partïon canlynol:

Gweithredwyr, cymdeithasau masnach a busnesau: dyma'ch cyfle i sicrhau bod y rheolau diwygiedig yn gweithio i chi a'ch diwydiant, ond hefyd yn darparu'r amddiffyniad angenrheidiol sydd eu hangen ar yr amgylchedd ac iechyd pobl.

Rheoleiddwyr eraill, y cyhoedd, grwpiau cymunedol a sefydliadau nad ydynt yn rhan o’r llywodraeth sydd â diddordeb mewn materion amgylcheddol: dyma’ch cyfle i sicrhau bod y rheolau diwygiedig yn darparu’r amddiffyniad angenrheidiol sydd eu hangen ar yr amgylchedd ac iechyd pobl, wrth barhau i fod yn ddefnyddiol i ddiwydiant.

Pam ein bod yn gwneud hyn?

Mae'r ymgynghoriad hwn yn ymdrin â rhai trwyddedau rheolau safonol newydd a diwygiedig, sy'n deillio o newidiadau arfaethedig i'r gyfundrefn esemptiadau gwastraff. Mae’r newidiadau hyn yn cael eu gwneud gan Lywodraeth Cymru ac Adran yr Amgylchedd, Bwyd a Materion Gwledig (Defra). Maent wedi bod yn gweithio ar newidiadau i ddeddfwriaeth i fynd i'r afael â throseddau gwastraff ac i leihau perfformiad gwael – Mynd i’r afael â throseddau yn y sector gwastraff a chyflwyno cosbau penodedig ar gyfer y ddyletswydd gofal o ran gwastraff. Roedd hyn yn cynnwys diwygiadau arfaethedig i esemptiadau gwastraff i wella cydymffurfedd ag esemptiadau a lleihau troseddau gwastraff. Roedd hefyd yn anelu at sicrhau bod risgiau llygredd yn cael eu rheoli'n well ac i leihau'r risg a achosir gan weithgareddau sydd wedi’u hesemptio, yn enwedig risgiau tân a gadael gwastraff.

Gallwch ddod o hyd i ragor o fanylion am y newidiadau arfaethedig i esemptiadau gwastraff yn nogfen ‘ymateb y llywodraeth’. Mae’r ddogfen hon yn egluro pa newidiadau y gallwn eu disgwyl, pam eu bod yn cael eu gwneud, a phryd maent yn debygol o ddigwydd. Ceir atodiad hefyd sy’n rhoi rhagor o fanylion am y newidiadau unigol, gan gynnwys yr amodau newydd ar gyfer pob un o’r esemptiadau diwygiedig.

Esemptiadau a fydd yn cael eu newid:

· U1 – Defnyddio gwastraff wrth adeiladu

· T4 – Triniaethau paratoadol (bwndelu, didoli, darnio, ac ati)

· T6 – Trin pren gwastraff

· T12 – Trin gwastraff â llaw

· D7 – Llosgi gwastraff ar dir agored

· S1 – Storio gwastraff mewn cynwysyddion diogel

· S2 – Storio gwastraff mewn lleoliad diogel

Esemptiadau a dynnir yn ôl:

· T8 – Triniaeth fecanyddol o deiars ar ddiwedd eu hoes

· T9 – Adfer metel sgrap

· U16 – Defnyddio rhannau o gerbydau ar ddiwedd eu hoes sydd wedi’u dadlygru

Yr hyn rydym yn ei wneud

O ganlyniad i'r newidiadau arfaethedig hyn, rydym yn disgwyl y bydd angen i ragor o weithgareddau gael eu rheoleiddio gan drwyddedau amgylcheddol. Mae hyn oherwydd bod tynnu esemptiad T8 yn ôl, er enghraifft, yn golygu y bydd angen trwydded ar unrhyw un sy’n trin teiars yn y dyfodol.

Ar ôl adolygu ein trwyddedau rheolau safonol i sicrhau bod trwyddedau addas ar gael i'r rhai yr effeithir arnynt gan y newidiadau, rydym wedi creu setiau rheolau newydd a diwygiedig ar gyfer nifer o weithgareddau gwastraff. Credwn y bydd y rhain yn helpu gweithredwyr i drosglwyddo o'r gyfundrefn esemptiadau i'r gyfundrefn drwyddedu. Mae'r setiau rheolau safonol newydd wedi'u hanelu'n bennaf at weithredwyr safleoedd gwastraff sy'n gweithredu ar hyn o bryd o dan esemptiadau T8 (ailgylchu teiars), T12 (ar gyfer ailgylchu matresi) a T4 (ar gyfer bwndelu papur, cardbord a phlastig).

Rydym yn cynnig creu'r trwyddedau rheolau safonol canlynol

Gwastraff nad yw'n beryglus (storio a thrin)

Tair set o reolau safonol newydd a'r asesiadau risg generig cysylltiedig, yn ogystal â'r taliadau sy'n gysylltiedig â'r setiau rheolau safonol newydd

· SR2024 Rhif 01 – Matresi gwastraff i'w hadfer i ddisodli esemptiad T12

· SR2024 Rhif 02 – Teiars gwastraff i'w hadfer i ddisodli esemptiad T8

· SR2024 Rhif 03 – Papur gwastraff, cardbord a phlastig i'w hadfer i ddisodli esemptiad T4

Rydym yn cynnig newid y trwyddedau rheolau safonol canlynol

Diwygiadau i ddwy set o reolau safonol presennol ynghyd â diweddariad i eiriad yr amodau canlynol. Ni chynigir unrhyw ddiwygiadau i'r asesiadau risg generig ar gyfer y gweithgareddau hyn.

· SR2008 Rhif 12 – Safle amwynder ar gyfer gwastraff cartref nad yw'n beryglus wedi'i ddiwygio i gynnwys teiars a gwastraff adeiladu a dymchwel

· SR2008 Rhif 13 – Safle amwynder ar gyfer gwastraff cartrefi peryglus ac nad yw'n beryglus wedi'i ddiwygio i gynnwys teiars a gwastraff adeiladu a dymchwel

Pam bod eich barn yn bwysig

We would like your views on the proposed changes to the following standard rules sets:

Yr ymgynghoriad hwn yw eich cyfle i wneud sylwadau ynghylch ein rheolau newydd arfaethedig a’r diwygiadau i’r rheolau presennol. Rydym am gael eich adborth yn arbennig ar y cwestiynau a geir ar y ddolen Rhannwch eich barn â ni. Bydd angen i chi edrych ar y trwyddedau rheolau safonol drafft.