Ymgynghoriad o reolau safonol: adolygiad o reolau safonol ar gyfer safle triniaeth fiolegol, gemegol a ffisegol slwtsh nad yw’n beryglus (SR2008 Rhif 19)

Trosolwg

Mae Rheoliadau Trwyddedu Amgylcheddol (Cymru a Lloegr) 2016 yn ein galluogi i wneud rheolau safonol i leihau’r baich gweinyddol ar fusnes, a chynnal safonau amgylcheddol ar yr un pryd.

Mae’r ymgynghoriad hwn yn cynnig:

• Tynnu’n ôl ac archifo setiau o reolau safonol

Mae’r asesiadau risg generig cysylltiedig hefyd wedi’u hadolygu mewn perthynas â’r newidiadau arfaethedig.

Cyn i ni wneud hyn, mae’n rhaid i ni ymgynghori am gyfnod o dri mis i ganiatáu i’r cyhoedd, diwydiant, ac unrhyw un arall sydd â diddordeb wneud sylwadau ar y cynigion. Rhaid inni ddarparu manylion ynghylch pam y gwneir y newidiadau hyn, ynghyd â chyfiawnhad.

Rydym yn cynnig newid y setiau o reolau safonol sy’n ymwneud â thrin biowastraff er mwyn:

• Lleihau digwyddiadau a achosir gan y sector biowastraff, gan gynnwys tanau a niwsans o ran aroglau
• Gwella perfformiad gwael
• Gwella cyfraniad at economi fwy cynaliadwy a chylchol
• Cyfrannu at leihau’r effaith ar newid yn yr hinsawdd
• Cael gwared ar hen setiau o reolau nad ydynt yn cael eu defnyddio

Drwy wneud hyn byddwn yn cyfyngu ar effeithiau negyddol ar iechyd pobl, cymunedau a’r amgylchedd.

Mae rhagor o fanylion am sut y bydd y newidiadau arfaethedig yn cyflawni’r amcanion hyn i’w gweld isod:

Pam bod eich barn yn bwysig

I bwy fydd hwn o ddiddordeb?

Credwn y bydd yr ymgynghoriad hwn o ddiddordeb arbennig i’r partïon canlynol:

Gweithredwyr rheolau safonol ar gyfer safle triniaeth fiolegol, gemegol a ffisegol slwtsh nad yw’n beryglus: Dyma’ch cyfle i sicrhau bod y rheolau diwygiedig yn gweithio i chi a’ch diwydiant, yn ogystal â darparu’r amddiffyniad y mae ei angen ar yr amgylchedd ac iechyd pobl.

Gweithredwyr, cymdeithasau masnach a busnesau eraill: Dyma’ch cyfle i sicrhau bod y rheolau diwygiedig yn gweithio i chi a’ch diwydiant, yn ogystal â darparu’r amddiffyniad y mae ei angen ar yr amgylchedd ac iechyd pobl.

Rheoleiddwyr eraill, y cyhoedd, grwpiau cymunedol a sefydliadau anllywodraethol sydd â diddordeb mewn materion amgylcheddol: Dyma’ch cyfle i sicrhau bod y rheolau diwygiedig yn darparu’r amddiffyniad y mae ei angen ar yr amgylchedd ac iechyd pobl, wrth barhau i fod yn ddefnyddiol i’r diwydiant.

Deiliaid presennol

Os ydych chi’n gweithredu ar hyn o bryd o dan reolau safonol sydd wedi’u cynnwys yn yr ymgynghoriad hwn, o ganlyniad i unrhyw newidiadau a wneir, bydd gofyn i chi gymryd un o’r camau canlynol:

1. Uwchraddio’ch safle i fodloni’r safonau a osodwyd gan y rheolau newydd.
2. Gwneud cais i amrywio’ch gweithgaredd i drwydded bwrpasol.
3. Gwneud cais i ildio’r drwydded.

Pwysig: Hyd yn oed os yw gweithredwr wedi rhoi’r gorau i weithredu, neu heb erioed ddechrau gweithredu, bydd ffioedd cynhaliaeth yn parhau i gronni nes bod ei drwydded yn cael ei hildio’n ffurfiol. Gweler: Cyfoeth Naturiol Cymru / Gwneud cais i ganslo (ildio) trwydded wastraff gyfan neu ran ohoni.

Mae’r penawdau canlynol yn amlinellu’r newidiadau arfaethedig ynghyd â’r rhesymau drostynt. Awgrymwn eich bod yn cymharu’r setiau o reolau safonol cyfredol â’r drafftiau arfaethedig yn adran ddolenni’r ymgynghoriad hwn.