Hufenfa Hwlffordd – Penderfyniad Drafft

Trosolwg

The First Milk Cheese Company wedi cyflwyno cais i Cyfoeth Naturiol Cymru (CNC) i newid ei drwydded amgylcheddol ar gyfer Hufenfa Hwlffordd (rhif y drwydded-EPR/XP3830UR). 

Mae’r newid hwn, a elwir yn ‘amrywiad’, yn ofyniad cyfreithiol o dan Reoliadau Trwyddedu Amgylcheddol (Cymru a Lloegr) 2016.

Rydym wedi asesu'r newidiadau arfaethedig ac yn bwriadu caniatáu'r amrywiad i’r drwydded.

Manylion y Cais

Cyfeirnod y Cais: PAN-027140

Math o gyfleuster rheoledig: Prif weithgaredd y weithfa hon yw Adran 6.8 Rhan A (1) (e) trin a phrosesu llaeth, gan fod maint y llaeth a dderbynnir yn fwy na 200 tunnell y dydd (gwerth cyfartalog yn flynyddol).

Mae'r drwydded hefyd yn caniatáu i'r gweithgareddau perthnasol canlynol ddigwydd:

• Adran 5.4 Rhan A(1)(a)(i) – gwaredu gwastraff amheryglus gyda chapasiti o fwy na 50 tunnell y dydd ac sy’n ymwneud ag un neu fwy o’r gweithgareddau canlynol (i) triniaeth fiolegol
• Atodlen 25A gweithfeydd hylosgi canolig.

Lleoliad y cyfleuster rheoledig: Hufenfa Hwlffordd, Heol Penfro, Pontfadlen, Hwlffordd, Sir Benfro, SA61 1JN.

Bydd yr amrywiad yn:

• Cynyddu uchafswm capasiti cynhyrchu'r hufenfa 227 tunnell y dydd — gan godi'r cynhyrchiad a ganiateir o 1260 tunnell y dydd i 1487 tunnell y dydd. Bydd hyn yn cynnwys gosod offer newydd, yn ogystal ag ehangu rhai offer presennol.
• Cynnwys proses ddyddodiad gemegol newydd yn y Gwaith Trin Elifiant. Nod hyn yw lleihau lefelau ffosfforws yn y dŵr gwastraff cyn iddo gael ei ryddhau.
• Oherwydd newidiadau mewn deddfwriaeth, newid tri boeler thermol 8 megawat (MWth) presennol y safle i Waith Hylosgi Canolig (MCP) gyda therfynau allyriadau cysylltiedig. (Mae un injan Gwres a Pŵer Cyfunedig 2.7MWth ar y safle eisoes wedi'i ddal fel MCP.)

Ein penderfyniad drafft

Rydym yn bwriadu caniatáu’r amrywiad i’r drwydded. Dim ond os credwn na fydd llygredd sylweddol yn cael ei achosi a bod gan y gweithredwr y gallu i fodloni amodau'r drwydded y byddwn yn caniatáu amrywio trwydded.

Mae'r drwydded yn cynnwys amodau priodol i ddiogelu iechyd pobl a'r amgylchedd. 

Pam y mae eich barn chi yn bwysig  

Dyma'ch cyfle i edrych ar ein penderfyniad drafft a chyflwyno eich sylwadau. Byddwn yn ystyried yr holl ymatebion perthnasol cyn i ni wneud ein penderfyniad terfynol ar y cais am drwydded. 

Gweler Cyfoeth Naturiol Cymru / Cyfranogiad y cyhoedd: sut y gallwch gymryd rhan yn ein hymgynghoriadau ar drwyddedau am ragor o wybodaeth am sut rydym yn ymgynghori a pha faterion sydd o fewn ein cylch gwaith rheoleiddio.  

Gallwch weld y dogfennau drafft canlynol gan ddefnyddio'r dolenni ar waelod y dudalen hon:

• Trwydded ddrafft
• Hysbysiad amrywio drafft
• Dogfen y penderfyniad drafft

Mae'r dogfennau hyn ar gael ar ein cofrestr gyhoeddus ar-lein hefyd.

Gallwch gyflwyno eich sylwadau gan ddefnyddio'r ddolen ymgynghori ar-lein isod. Os oes gennych unrhyw broblemau wrth gyflwyno eich sylwadau, gallwch anfon eich sylwadau atom drwy e-bost i permittingconsultations@naturalresourceswales.gov.uk.