Cynllun Pobl Niwbwrch

Trosolwg

Mae ein gwaith parhaus a sgyrsiau cymunedol yn edrych ar sut i reoli Gwarchodfa Natur Genedlaethol a Choedwig Niwbwrch yn y dyfodol yn parhau.

Mae aelodau'r cyhoedd a rhanddeiliaid yn parhau i fwydo i mewn i Gynllun Pobl Niwbwrch wrth iddo gael ei ddatblygu, a bydd y cynllun hwn yn ein harwain ni a'n partneriaid i reoli mynediad, gweithgareddau, yr amgylchedd naturiol, treftadaeth a diwylliant.

Hoffem ddiolch i bawb sydd wedi rhoi adborth yn ein sesiynau galw heibio neu ar-lein, gan ein helpu i gasglu tystiolaeth, meithrin perthnasoedd, a deall yn well beth sy'n digwydd yn Niwbwrch.

Rydym yn parhau i wrando ar eich syniadau, a thrwy ein harolwg yn gynharach yn y flwyddyn a'r adborth parhaus ers hynny, rydych wedi dweud wrthym am eich pryderon ynghylch mynediad a thraffig, rheoli parcio, cael presenoldeb gweladwy ar y safle, darparu gwybodaeth hygyrch i helpu ymwelwyr i wneud penderfyniadau ar sail gwybodaeth, a chydbwyso anghenion ymwelwyr â nodau cadwraeth.

Yr awgrymiadau a gasglwyd yn ystod y broses hon y mae angen inni eu harchwilio ymhellach gyda phawb yw'r newidiadau i’r maes parcio a gynigir, archwilio cynllun parcio a theithio, gwella mynediad i lwybrau troed a beiciau, gwneud newidiadau i sut mae traffig yn cael ei reoli o fewn ac o gwmpas y safle, a rhoi ystyriaeth i ystod eang o grwpiau defnyddwyr megis marchogwyr a’r rhai ag anableddau.

Gyda chefnogaeth CNC a Chyngor Sir Ynys Môn, cynhaliodd Bwrdd Gwasanaethau Cyhoeddus Gwynedd ac Ynys Môn ddigwyddiad rhyngweithiol ar Fawrth 7 i greu syniadau, dod o hyd i atebion, a meithrin cydweithrediad o ran mynediad a thrafnidiaeth yn Niwbwrch a’r cyffiniau.

Roedd y gweithdy cymunedol, a hwyluswyd gan yr asiantaeth ddatblygu ‘Cwmpas’, yn galluogi pobl leol, busnesau, sefydliadau cymunedol a gwasanaethau cyhoeddus i gydweithio.

Gallwch ddod o hyd i adroddiad o’r digwyddiad ar waelod y dudalen hon.

Rydym yn gweithio gyda'n gilydd oherwydd ni all yr un sefydliad ddatrys y mater ar ben ei hun, a byddwn yn parhau i weithio gyda'r gymuned i ddod o hyd i atebion i wella pethau.

Bydd sesiynau ‘drws agored’ cymunedol anffurfiol pellach yn cael eu cynnal yn ystod y misoedd nesaf a byddwn yn parhau i roi’r wybodaeth ddiweddaraf i aelodau’r cyhoedd.

Mae hyn yn rhan o'n hymrwymiad i barhau i weithio gydag eraill a bydd yn helpu i lywio fersiwn ddrafft o'r Cynllun Pobl, a fydd yn cael ei rhannu gyda'r gymuned, gan gynnig mwy o gyfleoedd i chi rannu eich barn.

Mae gwaith ar ddatblygu’r Cynllun Pobl drafft wedi parhau ochr yn ochr â’r gwaith canlynol:

• Gwaith cadwraeth ac adfer ar y safle, gan gynnwys prosiectau dan arweiniad tîm Twyni Tywod LIFE.
• Atgyweiriadau wyneb ffordd ym mis Mai ar brif ffordd fynediad y safle er mwyn gwella mynediad a sut rydym yn rheoli traffig.
• Mae Mobi-Mat symudol, wedi'i wneud o blastig wedi'i ailgylchu, wedi'i osod i wella mynediad i'r traeth.
• Rydym wedi bod yn meithrin perthynas agosach â thîm Ardal o Harddwch Naturiol Eithriadol Ynys Môn, gan weithio ar fentrau sy’n cynnwys darparu cadeiriau olwyn y gellir eu defnyddio ar y traeth a chynnal digwyddiadau i wirfoddolwyr.
• Diweddaru arwyddion yn rhoi gwybodaeth am gyfyngiadau ynghylch cŵn ar y safle.
• Rydym yn parhau i weithio ar gwblhau ein Cynllun Adnoddau Coedwig ar gyfer Niwbwrch. Cyhoeddir diweddariadau pellach ar fersiwn derfynol y cynllun yr hydref hwn.
• Mae blogiau staff rheolaidd wedi cael eu cyhoeddi ar-lein i roi gwell dealltwriaeth o agweddau bioamrywiaeth a chadwraeth y safle.  Mae’r rhain, ynghyd ag erthyglau newyddion am Niwbwrch a’n gwaith arall, ar gael yn yr adran newyddion ar wefan Cyfoeth Naturiol Cymru.

Eleni, dychwelodd niferoedd yr ymwelwyr i lefelau sy’n debyg i’r rhai a gafwyd cyn COVID-19, ac rydym yn dechrau gweld patrymau defnyddio gwahanol. Defnyddiwyd llai o ddulliau rheoli traffig rhwng mis Mai a mis Awst eleni nag yn ystod yr un cyfnod y llynedd.

Bydd meithrin gwell dealltwriaeth o sut mae pobl yn defnyddio ac yn gwerthfawrogi’r safle, a beth yw eu hanghenion, yn ein helpu i weithio gyda’n partneriaid ar reoli perthynas y safle â’r gymuned gyfagos mewn ffordd gydweithredol.

Bydd hyn yn ein galluogi i sicrhau bod profiad pawb mor dda â phosibl wrth barchu, gwarchod a gwella'r amgylchedd naturiol, yr ardal leol, a buddiannau'r bobl sy'n byw ac yn gweithio yno.

Bydd Cynllun Pobl Niwbwrch yn gweithio ochr yn ochr â chynlluniau eraill, gan weithio tuag at ffordd integredig o reoli'r safle a deall cysylltiadau â'r ardal ehangach.

Ni allwn wneud hyn ar ein pen ein hunain, felly rydym yn gweithio gyda'r gymuned, rhanddeiliaid a phartneriaid allweddol fel Cyngor Sir Ynys Môn i gael eu barn ar sut y gallwn ddatblygu'r cynllun hwn.

Gyda’n gilydd, y nod yw siapio a goruchwylio sut mae pobl yn rhyngweithio â’r safle a’i gyffiniau, wrth ystyried effaith prosesau naturiol a newid hinsawdd, a'n dyhead i fod yn gymydog da.

Byddwn yn cynnal sesiynau galw heibio cymunedol pellach fel y gall aelodau'r cyhoedd barhau i fewnbynnu a rhannu eu profiadau a gallwch gael yr wybodaeth ddiweddaraf trwy chwilio am “Cynllun Pobl Niwbwrch” ar-lein.

Os hoffech rannu eich barn gyda ni, holi am ein gwaith neu gofrestru ar gyfer ein rhestr rhanddeiliaid, gallwch wneud hynny yn niwbwrch@cyfoethnaturiolcymru.gov.uk

Gallwch hefyd ein dilyn ar Facebook yn www.facebook.com/CyfNatCymGO