Prosiect adeiladu llwybr pysgod a llysywod Bontnewydd

Trosolwg

English version available here.

Pa waith sy'n digwydd?

Aseswyd cored Bontnewydd fel rhwystr i bysgod a llysywod yn Afon Gwyrfai. Mae’r gwaith arfaethedig yn cynnwys:

• Amnewid y morglawdd creigiau yn union i lawr yr afon o'r gored i wella gallu pysgod i fudo i fyny'r afon.
• Gosod llwybr llysywod dros y gored trwy addasu ei harwynebedd i greu gorffeniad garw, wedi'i frwsio y gall llysywod afael ynddo.
• Atgyweirio rhan o’r wal adain ar y lan chwith, sy'n cael ei thanseilio.

Er mwyn tarfu cyn lleied â phosibl, gosodir argae ar draws hanner o sianel yr afon ar y tro, gan ganiatáu i'r afon barhau i lifo drwy'r rhan agored.

Bydd y rhan lle mae’r morglawdd creigiau yn cynnwys gosod clogfeini mewn gwely concrit. Bydd yn cael ei gastio mewn chwe adran, sy’n golygu y bydd y broses yn cymryd llawer o amser (gweler y llun isod).

Bydd y wal adain yn cael ei newid am wal newydd debyg unwaith y bydd yr holl waith arall yn y sianel wedi'i gwblhau.

Mae perchennog y tir a chynghorwyr lleol wedi cael gwybod am y gwaith hwn. Mae'r holl eiddo sydd â’u cefn at y man gwaith a'r llwybr mynediad i'r man gwaith wedi derbyn llythyr yn amlinellu'r prosiect a'i ddiben.

Argraff arlunydd o'r gwaith:

Pryd fydd y gwaith yn dechrau ac yn gorffen?

Y bwriad yw cychwyn y gwaith mynediad i'r safle ym mis Ebrill 2025, gyda gwaith yn y sianel yn dechrau ym mis Mai 2025. Disgwylir i'r holl waith gael ei gwblhau erbyn mis Medi 2025. Fodd bynnag, oherwydd natur gweithio mewn cyrsiau dŵr a chyfyngiadau tywydd posibl, gall y dyddiadau hyn newid.

Gwneir ymdrechion i gadw sŵn i'r lefel leiaf posibl. Er enghraifft, bydd lefel y sŵn yn cael ei lleihau ar unrhyw bympiau a ddefnyddir. 8am tan 6pm fydd yr oriau gwaith, ac nid oes unrhyw waith wedi'i gynllunio ar gyfer penwythnosau, oni bai fod yna argyfwng oherwydd materion yn ymwneud â'r tywydd.

Ble fydd y gwaith yn digwydd?

Bydd y gwaith yn cael ei wneud ar gored fesur Afon Gwyrfai ac ardal y ramp creigiau yn union i lawr yr afon. Bydd yr holl waith yn cael ei wneud naill ai o'r lan chwith neu o fewn y sianel.

Bydd y gweithwyr yn cyrraedd y safle trwy giât newydd oddi ar Digbeth Terrace.

Pwy sy’n gwneud y gwaith?

Y contractwr ar gyfer y gwaith hwn yw William Hughes (Peirianneg Sifil) Cyf.

Bydd diweddariadau pellach yn cael eu darparu ar y dudalen we hon wrth i’r prosiect fynd rhagddo. Ar gyfer ymholiadau, gellir cysylltu â thîm y prosiect trwy e-bost ar:

ymholiadau@cyfoethnaturiolcymru.gov.uk 

Fel arall, gallwch ffonio Cyfoeth Naturiol Cymru ar 0300 065 3000 a gadael eich manylion i gael galwad yn ôl.

Cysylltwyd eisoes â phreswylwyr a busnesau yr effeithir arnynt yn uniongyrchol. Ochr yn ochr â’n contractwyr, byddwn yn parhau i ymgysylltu â thirfeddianwyr yn unigol i gynllunio’r gwaith a lleihau aflonyddwch.