Cynlluniau Newydd ar Gyfer Gogledd Dyffryn Gwy (Wye Valley North)

Isod ceri crynodeb o amcanion ar gyfer y cynllun:

• Mae adfer y coetir hynafol yn ardal Cynllun Adnoddau Coedwig yn brif amcan yn unol â Datganiad Ardal y De-ddwyrain, Strategaeth Coetir Llywodraeth Cymru, a Chynllun Gweithredu AHNE Dyffryn Gwy, gyda chael gwared ar goed conwydd presennol yn raddol dros amser trwy Systemau Coedamaeth Bach eu Heffaith gan ganiatáu aildyfiant naturiol o goed llydanddail a thyfu amrywiaeth o rywogaethau.
• Cynnal cynhyrchu pren lle bo’n briodol, gan gynnwys coed llydanddail cynhyrchiol. Bydd hyn yn rhoi cyfleoedd i amrywio rhywogaethau a strwythur y coetiroedd, a fydd yn gwella cynaliadwyedd a gwytnwch y coedwigoedd, yn ogystal â darparu buddion economaidd.
• Amrywio cyfansoddiad rhywogaethau'r goedwig i gynyddu eu gallu i wrthsefyll plâu a chlefydau ac ar yr un pryd creu coedwig gref ar gyfer cenedlaethau'r dyfodol. Cael gwared ar y clystyrau o larwydd sy'n weddill, rheoli coed ynn, a rheoli rhywogaethau estron goresgynnol yn briodol, gan gynnwys llawr-geirios.
• Buddsoddi mewn seilwaith coedwig i ddarparu gwell mynediad i ganiatáu amodau rheoli mwy amrywiol o fewn y coetiroedd, teneuo’n rheolaidd lle bo’n bosibl, cael gwared ar y clystyrau llarwydd sy’n weddill, ac amcanion cadwraeth.
• Gweithio gyda phartneriaid a thimau CNC eraill i nodi a darparu cyfleoedd i gysylltu a gwella cynefinoedd â blaenoriaeth, ardaloedd gwarchodedig o fewn a gerllaw coetiroedd Cynllun Adnoddau Coedwig, a rhywogaethau â blaenoriaeth a rhai a warchodir, i wella gwydnwch a chysylltedd ac atal effeithiau negyddol gweithgareddau rheoli. Megis cysylltu ac adfer coetir hynafol a brodorol, prysgoedio, cysylltu cynefinoedd a rhodfeydd agored, ystyried yr amrywiol rywogaethau o ystlumod sydd i’w cael yn yr ardal yn ystod unrhyw weithgareddau rheoli, ac adfer ac ehangu ardaloedd o weundir agored lle bo’n briodol.
• Gweithio gyda phartneriaid i annog a chynyddu defnydd cyfrifol a hamdden effaith isel ar Ystad Goetir Llywodraeth Cymru i sicrhau manteision llesiant i gymunedau lleol, grwpiau defnyddwyr ac ymwelwyr, ac i leihau ymddygiad gwrthgymdeithasol, gan gynnwys cerbydau oddi ar y ffordd, a thipio anghyfreithlon.
• Ni ddylai rheoli coedwigaeth gyfrannu at y lefel bresennol o berygl llifogydd o fewn y coetiroedd ac unrhyw le oddi ar y safle a lle bo modd, dylid rhoi mesurau ar waith i leihau unrhyw berygl llifogydd posibl; y bwriad yw cyflawni’r ddau drwy arfer coedwigaeth da yn unol â Safon Goedwigaeth ddiweddaraf y DU a chanllawiau coedwigaeth perthnasol; a thrwy ymgynghori ac ymgysylltu â'r Awdurdod Llifogydd Lleol Arweiniol perthnasol wrth gynllunio gweithrediadau cwympo. Wrth ystyried mesurau i leihau maint y llif sy'n gadael blociau coedwig o ganlyniad i waith cwympo, dylid cynnwys Rheoli Llifogydd yn Naturiol.
• Ni ddylai rheoli coedwigaeth achosi unrhyw ostyngiad yn ansawdd y dŵr o fewn nodweddion dŵr ar y safle a chyrsiau dŵr sy'n draenio oddi ar y safle trwy arfer coedwigaeth da yn unol â Safon Coedwigaeth ddiweddaraf y DU a chanllawiau coedwigaeth perthnasol, a dylai gymryd sylw o Gynllun Rheoli Basn Afon Hafren (2021-2027).
• Gweithio gyda’n partneriaid a’n cymunedau i nodi sut a ble y gall Ystad Goetir Llywodraeth Cymru ddarparu atebion seiliedig ar natur ar gyfer iechyd a lles a darparu cyfleoedd i gysylltu pobl â byd natur, a lle gallwn gynnwys cymunedau yn y gwaith o’i reoli.
• Bod yn gymdogion da - Ymgynghori ac ymgysylltu â chymdogion, cymunedau a rhanddeiliaid eraill ynghylch rheoli Ystad Goetir Llywodraeth Cymru a gweithrediadau sydd ar ddod i wella perthnasoedd a gwybodaeth am sut a pham y caiff yr ystad ei rheoli, lleihau gwrthdaro, ac annog perthnasoedd gwaith agosach.
• Gweithio gyda chymdogion a rhanddeiliaid eraill gyda golwg ar reoli ceirw, gwiwerod llwyd a baeddod gwyllt ar Ystad Goetir Llywodraeth Cymru ac ardaloedd cyfagos i leihau effeithiau negyddol. Rheoli mannau agored ar ystad goetir Llywodraeth Cymru i hwyluso rheoli bywyd gwyllt.