Cynllun Adnoddau Coedwig Alwen

Trosolwg

Mae Cyfoeth Naturiol Cymru (CNC) yn gyfrifol am reoli coetiroedd a choedwigoedd cyhoeddus Cymru, sef Ystad Goetir Llywodraeth Cymru, mewn ffordd gynaliadwy. Mae’r Ystad yn darparu adnoddau pren gwerthfawr a chânt eu rheoli hefyd er budd a llesiant pobl a’r cymunedau lleol sy’n ymweld â nhw, yn ogystal â’r bobl sy’n dibynnu arnynt i wneud bywoliaeth. Mae’r cyfrifoldeb hwn yn cynnwys sicrhau eu bod yn gydnerth yn y tymor hir, mewn perthynas â’r argyfyngau natur a hinsawdd, er mwyn i genedlaethau’r dyfodol hefyd allu mwynhau’r buddion maent yn eu cynnig. Bob deng mlynedd, mae CNC yn adolygu’r cynlluniau rheoli hirdymor ar gyfer pob ardal goedwig, y Cynllun Adnoddau Coedwig.

Lleoliad Alwen

Mae gan Gynllun Adnodd Coedwig Alwen arwynebedd o 1,382 ha i gyd, sy’n cynnwys conwydd yn bennaf. Mae coedwig Alwen yn rhannol o fewn SoDdGA Mynydd Hiraethog ac mae’r rhan fwyaf ohoni yn swatio rhwng ffordd B4501 a ffordd A543 (Pentrefoelas i Ddinbych). Mae cronfa ddŵr Alwen yn ffurfio nodwedd amlwg ar y dirwedd ac wedi’i lleoli ym mhen deheuol y goedwig gyda Llyn Brenig, (cronfa ddŵr ac atyniad i ymwelwyr) yn union i’r dwyrain o derfyn y Cynllun Adnodd Coedwig. Mae’r ddau gorff dŵr a’r seilwaith cysylltiedig yn eiddo i Dŵr Cymru, sydd hefyd yn eu rheoli.

Mae cynefin o amgylch blociau Cynllun Adnodd Coedwig Alwen yn cynnwys tir pori amaethyddol a rhostir agored, blociau o goedwigoedd conwydd masnachol, sy’n dominyddu’r tiroedd uchaf a choetiroedd conwydd/llydanddail ar y llethrau isaf ac ar lannau’r afonydd.

Mae rhannau o goedwig Alwen wedi’u neilltuo ar gyfer mynediad agored ar droed dan Ddeddf Cefn Gwlad a Hawliau Tramwy, ac mae’r goedwig hefyd yn cynnwys cyfres o lwybrau troed, llwybrau cerdded a llwybr beicio. Caniateir mynediad i geffylau a beiciau ar ffyrdd y goedwig gyda chaniatâd.

Mae Coedwig Alwen yn perthyn i saith dalgylch afon gwahanol fel sy’n cael ei ddiffinio gan y Gyfarwyddeb Fframwaith Dŵr sydd, yn ei dro, o fewn dalgylchoedd mwy Dyfrdwy, Clwyd a Chonwy.

Cyfleoedd a Blaenoriaethau

• Cynyddu amrywiaeth strwythurol a chadwraeth Gwiwerod Cochion drwy warchodfeydd naturiol, a Choedwigaeth Gorchudd Parhaus.

• Cynyddu’r ardaloedd sy’n cael eu rheoli fel mawndir corslyd drwy drawsnewid coedwig gonwydd ac ail-wlychu ardaloedd agored.

• Parhau i gynhyrchu cyflenwad cynaliadwy o bren drwy gynllunio gwaith cwympo a dewis pa rywogaethau sy’n cael eu hailstocio.

• Rhagor o ardaloedd o goetiroedd olynol / torlannol er mwyn gwella cydnerthedd cynefinoedd a chysylltiadau cynefinoedd ar raddfa tirwedd.

• Nodi a diogelu nodweddion treftadaeth pwysig, gan gynnwys yr amgylchedd naturiol hanesyddol.

• Parhau i nodi ac adfer nodweddion safleoedd coetir hynafol ac ardaloedd o ddiddordeb cadwraethol.

• Cynnal a gwella profiad ymwelwyr drwy ddarparu amgylchedd amrywiol sy’n ddiogel ac yn rhoi mwynhad.  

Mae'r ddogfen hon yn helpu i esbonio'r categorïau a ddangosir ar y mapiau isod:

Esboniad o allweddi’r map

Crynodeb o’r prif newidiadau a fydd yn cael eu gwneud yn y goedwig

• Adfer safleoedd coetir hynafol (6ha) drwy gael gwared o gonwydd a chreu cynefin llydanddail brodorol.

• Cynyddu cynefin coetir llydanddail o 7.5% i 10% o arwynebedd y goedwig

• Lleihau gorchudd sbriws Sitka o 56% i 47% erbyn diwedd cyfnod y Cynllun Adnodd Coedwig.

• Adfer 90Ha o dir wedi’i goedwigo yn gynefin mawn dwfn - sy’n cynnwys 46.7 ha o gynefin agored a 43.3 ha o goetir olynol.

• Cynyddu cynefin tir agored i 16% o ardal y Cynllun Adnodd Coedwig.

Bydd yna sesiwn galw heibio yng Nghanolfan Addysg Uwchaled, Cerrigydrudion, o 3.30-7.30yh ddydd Mercher 7 Rhagfyr 2022 i roi cyfle i aelodau’r cyhoedd drafod yn bersonol â chynllunwyr coedwigaeth CNC.

Pam bod eich barn yn bwysig

Hoffem wybod eich barn a'ch teimladau ynghylch y cynlluniau newydd ar gyfer coedwig Alwen er mwyn ein helpu i wella rheolaeth hirdymor y goedwig.

Beth sy'n digwydd nesaf

Bydd crynodeb o ymatebion a chanlyniadau'r ymgynghoriad ar gael ar y wefan hon bedair i chwe wythnos wedi'r dyddiad cau.