Gweithio gyda’n Gilydd

Mae'r ymgynghoriad hwn, o’r enw Gweithio gyda’n Gilydd, yn anelu at roi gwybod i bawb beth rydym yn ei wneud, pryd a pham. Mae'n ein helpu i ddarganfod pwy sydd eisiau cael eu cynnwys a'r ffordd orau i'w cynnwys yn y broses.

Y cam nesaf yw'r ymgynghoriad heriau a dewisiadau, sydd i fod i ddechrau ym mis Mehefin 2025. Byddwn yn rhannu'r hyn rydym yn ei wybod ac yn ei ddysgu gan eraill i'n helpu i nodi'r materion rheoli dŵr sylweddol. Byddwn yn ymgynghori ar yr hyn y gellir ei wneud yn eu cylch a phwy all ein helpu i wneud hyn

Cynhelir yr ymgynghoriadau terfynol ar y Cynlluniau Rheoli Basnau Afonydd drafft ar ôl eu diweddaru. Rydym yn disgwyl i’r ymgynghoriad hwn agor ym mis Mehefin 2026. Bydd y cynlluniau drafft yn dosbarthu cyrff dŵr ac yn gosod amcanion ar gyfer statws cyrff dŵr hyd at 2033. Byddwn yn nodi mesurau i fynd i'r afael â materion a sut y caiff y mesurau hyn eu cyflawni ar raddfa leol. Byddwch yn cael y cyfle i ymateb i ymgynghoriad ar y cynlluniau drafft hyn, gan gynnwys lefel eu huchelgais ar gyfer yr amgylchedd dŵr a’u hymrwymiad i gyflawni.

Erbyn Rhagfyr 2027, ein nod yw i Weinidogion fod wedi cymeradwyo'r Cynlluniau Rheoli Basnau Afonydd wedi'u diweddaru ac i'r cynlluniau fod wedi’u cyhoeddi.  Mae’r rhain yn pennu’r cyfeiriad ar gyfer sut y byddwn yn rheoli, diogelu a gwella ein hamgylchedd dŵr yng Nghymru hyd at 2033.

Bydd Asesiad Amgylcheddol Strategol ac Asesiad Rheoliadau Cynefinoedd yn cael eu cynnal ochr yn ochr â'r Cynlluniau Rheoli Basnau Afonydd er mwyn dylanwadu ar eu datblygiad a’i lywio. Mae'r rhain yn ofyniad cyfreithiol ac fe'u cynhelir i asesu a allai ein cynigion ar gyfer gwella'r amgylchedd dŵr gael canlyniadau bwriadol neu anfwriadol ar bobl neu'r amgylchedd ehangach.

Mae diddordeb y cyhoedd yn ein dyfroedd wedi dwysáu yn ystod y blynyddoedd diwethaf, gyda materion fel llygredd a sychder yn y penawdau. Rydym eisiau cofleidio hyn a gweithio gyda phawb, gan gynnwys y rhai nad ydym wedi gweithio gyda nhw o'r blaen. Nid y broses ffurfiol a amlinellir uchod yw'r unig ffordd y gallwch ymgysylltu â ni.

Rydym am weithio gyda grwpiau cenedlaethol a lleol ac ymgysylltu â’r holl randdeiliaid sydd â diddordeb mewn dŵr. Mae hyn yn cynnwys cadwraeth, amaethyddiaeth, busnes, hamdden, llywodraeth leol a rhanbarthol, genweirio, y diwydiant dŵr, ynni, mordwyo, pysgodfeydd pysgod cregyn, trafnidiaeth, mwyngloddio, a sefydliadau academaidd. Rydym yn croesawu mewnbwn gan sefydliadau ac unigolion newydd i'n galluogi i ddysgu o brofiadau a gwybodaeth pawb am ein dyfroedd.

Byddwn yn ceisio sicrhau bod cynlluniau a strategaethau perthnasol eraill, yn lleol ac yn genedlaethol, yn cael eu hystyried yn ein hadolygiad o Gynlluniau Rheoli Basnau Afonydd. Ceir rhagor o fanylion am hyn yn y tabl isod. Byddwn yn parhau i ymgysylltu â pherchnogion cynlluniau a strategaethau perthnasol ar bob cam o'n proses.

Mae Cymru wedi’i rhannu’n dair Ardal Basn Afon, sef Gorllewin Cymru, Dyfrdwy a Hafren, a dangosir hyn yn y map isod.  Mae ffiniau Ardaloedd Basn Afon Dyfrdwy a Hafren yn ymestyn i mewn i Loegr. Rydym yn gweithio gydag Asiantaeth yr Amgylchedd ar y Cynlluniau Rheoli Basnau Afonydd hyn. Mae CNC yn arwain ar yr ymgynghoriadau a’r Cynlluniau Rheoli Basnau Afonydd diweddaraf ar gyfer Ardaloedd Basn Afon Gorllewin Cymru a Dyfrdwy, ac mae Asiantaeth yr Amgylchedd yn arwain ar Ardal Basn Afon Hafren.

Bydd ymgynghoriad ‘Gweithio Gyda’n Gilydd’ Asiantaeth yr Amgylchedd y nagor ym mis Hydref 2024 – fe rown ni ddolen at yr ymgynghoriad ar y dudalen hon bryd hynny.