Ymgynghoriad ar ddirymu a thynnu wyth trwydded wastraff rheolau safonol yn ôl

Trosolwg

Mae’r ymgynghoriad hwn bellach wedi cau. Mae ein hymateb i'r sylwadau a dderbyniwyd i'w weld isod.

Ein hymateb

O’r tri ymatebydd, cytunodd un i fod yr holl drwyddedau rheolau safonol ar gyfer cyfarpar hylosgi canolig a generaduron penodedig yn cael eu tynnu’n ôl neu eu dirymu, ni roddodd un unrhyw sylwadau, a gwrthwynebodd un ar sail y posibilrwydd nad yw rhai gweithredwyr efallai’n ymwybodol o’r gofynion trwyddedu ac efallai nad yw CNC wedi llwyddo i gyrraedd yr holl bartïon sydd â diddordeb.

Awgrymodd yr ymatebydd a oedd yn cytuno â’r cynigion mai un o’r rhesymau pam nad oes gan lawer o safleoedd drwydded rheolau safonol oedd am fod y meini prawf yn llym.

Adolygodd CNC y trwyddedau rheolau safonol ar gyfer cyfarpar hylosgi canolig a generaduron penodedig yn 2019 a’u diwygio i ehangu eu cwmpas lle roedd yn briodol. Fe wnaethom ddiwygio SR2018 Rhif 1 i 6 a Rhif 8 i ddarparu ar gyfer generaduron penodedig a allai gynnwys cyfarpar hylosgi canolig newydd a hefyd SR2018 Rhif 7 ar gyfer cyfarpar hylosgi canolig newydd i ehangu nifer y senarios o fewn y rheolau. Fodd bynnag, mae’r nifer fawr o safleoedd sensitif yng Nghymru yn cyfyngu ar ble gellir defnyddio’r trwyddedau hyn, ac ni welsom unrhyw gynnydd yn eu defnydd.

Er ein bod yn gwerthfawrogi efallai nad yw rhai gweithredwyr yn ymwybodol o’r gofynion ar gyfer cyfarpar hylosgi canolig a generaduron penodedig, rydym wedi cynyddu ymwybyddiaeth drwy gyfrwng gweminarau ar y cyd â rheoleiddwyr eraill yn y DU, wedi rhoi diweddariadau i Gymdeithasau Masnach perthnasol, wedi diweddaru ein gwefan, wedi anfon arolwg ar-lein at dros 300 o weithredwyr newydd posibl yng Nghymru ac wedi cyfathrebu drwy gyfrwng Twitter, LinkedIn a Facebook.

Rhaid nodi mai’r gweithredwr sy’n gyfrifol am gael y drwydded gywir a chydymffurfio ag amodau’r drwydded erbyn y dyddiad perthnasol.

Ar sail yr ymatebion a gafwyd i’r ymgynghoriad a’u bod wedi’u defnyddio a’u rhoi ar waith yng Nghymru mewn ffordd gyfyngedig yn unig hyd yma, mae CNC wedi penderfynu tynnu’n ôl a/neu ddirymu’r holl drwyddedau rheolau safonol ar gyfer cyfarpar hylosgi canolig a generaduron penodedig. Byddwn yn parhau i adolygu priodoldeb a chymesuredd y broses drwyddedu gan gynnwys profiadau sy’n deillio o drwyddedu’r cyfarpar hylosgi canolig presennol, sydd ar y gweill ar hyn o bryd.

Pam bod eich safbwyntiau o bwys

Datblygwyd trwyddedau rheolau safonol o dan Reoliadau Trwyddedu Amgylcheddol (Cymru a Lloegr) 2016. Maen nhw’n ein galluogi ni i gynnig trwyddedau safonol sy’n lleihau’r baich gweinyddol ar fusnesau, gan gynnal safonau amgylcheddol yr un pryd. Maen nhw’n seiliedig ar gyfresi o reolau safonol y gallwn ni eu cymhwyso’n eang. 

Mae’r ymgynghoriad hwn yn cynnig: 

• Dirymu chwech o drwyddedau rheolau safonol 
• Tynnu’n ôl ac archifo dwy drwydded rheolau safonol 

Rydyn ni’n defnyddio’r term ‘dirymu’ pan fo trwydded rheolau safonol yn cael ei thynnu. Nid yw ar gael mwyach er mwyn wneud cais ar ei chyfer ac nid oes ganddi unrhyw ddeiliaid. 

Mae gan rai trwyddedau rheolau safonol ddeiliaid ond nid ydynt ar gael ar gyfer ceisiadau newydd. Dywedwn fod y rhain ‘wedi’u tynnu’n ôl a’u harchifo’. 

Gallwch weld y trwyddedau rheolau safonol yn adran ‘Lawrlwythiadau dogfennau cysylltiedig’ rheolau safonol ac asesiadau risg ar gyfer cyfarpar hylosgi canolig a generaduron penodol. 

Rheolau safonol rydyn ni’n cynnig eu dirymu 

Rydyn ni’n cynnig dirymu’r trwyddedau rheolau safonol. Nid ydynt yn cael eu defnyddio ac nid oes ganddynt unrhyw ddeiliaid: 

• Rheolau safonol 2018 Rhif 2  generadur penodol, Tranche B gweithrediad llwyth sylfaenol rhwng 0 – 2 MWth gyda lefel uchel o NOx yn y cefndir 
• Rheolau safonol 2018 Rhif 3 generadur penodol, Tranche B, gweithrediad llwyth safonol rhwng 0 – 2 MWth mewn ardal rheoli ansawdd aer (AQMA)  
• Rheolau safonol 2018 Rhif 4 generadur penodol, Tranche B rhwng 0 – 20 MWth wedi gweithredu llai na 500 awr   
• Rheolau safonol 2018 Rhif 5 generadur penodol, Tranche B rhwng 0 – 20 MWth wedi gweithredu llai na 1,500 awr  
• Rheolau safonol 2018 Rhif 6  generadur penodol, Tranche B, gweithrediad llwyth sylfaenol rhwng 0 – 1.3 MWth, gyda lefel uchel o NOx. 
• Rheolau safonol 2018 Rhif 8  generadur penodol symudol Tranche B gweithrediad llwyth sylfaenol rhwng 0 – 2 MWth. 

Rheolau safonol sydd wedi’u tynnu’n ôl rydyn ni’n cynnig eu dirymu 

Rydyn ni’n cynnig tynnu’n ôl ac archifo’r ddwy drwydded rheolau safonol ganlynol. Er bod rhai deiliaid o hyd, ni ellir gwneud cais ar eu cyfer bellach: 

• Rheolau safonol 2018 Rhif 1 generadur penodol, Tranche B, gweithrediad llwyth sylfaenol rhwng 0 - 5 MWth  
• Rheolau safonol 2018 Rhif 7  Gweithfa hylosgi ganolig sefydlog 1 a llai na 20MWth. 

Beth fyddai'n digwydd pe bai fy set o reolau safonol yn cael ei thynnu'n ôl o ganlyniad i'r ymgynghoriad hwn? 

Does dim yn newid. Byddai eich trwydded yn parhau mewn grym, a byddech yn dal i allu parhau â'ch gweithgaredd. Byddech yn parhau i weithredu yn unol â’r amodau a geir yn eich set o reoliadau safonol yn eich trwydded. 

Beth sy'n digwydd nesaf

Mae'r ymgynghoriad hwn ar gau